Sut i wneud cais am Gredyd Cynhwysol

I wneud cais am Gredyd Cynhwysol, bydd angen:

• manylion cyfrif banc
• cyfeiriad e-bost
• Prawf o hunaniaeth – fel pasbort, trwydded yrru, cerdyn debyd neu gredyd.

Hefyd, bydd angen manylion eich:

• incwm
• costau tai – fel rhent, morgais a thaliadau gwasanaeth
• costau gofal plant
• cynilion a buddsoddiadau
• ffurflen P45 – os ydych chi wedi colli’ch swydd.

Os ydych chi’n poeni am brofi’ch hunaniaeth, neu os nad oes gennych y dogfennau cywir, siaradwch ag ymgynghorydd Credyd Cynhwysol am ddim i gael help.

Os ydych yn gwneud cais newydd am fudd-daliadau, fel arfer mae’n well gwneud cais cyn gynted ag y gallwch. Y rheswm am hyn yw mai dim ond un mis y gellir ôl-ddyddio taliadau Credyd Cynhwysol.

Ond, os ydych chi’n hawlio gan eich bod wedi colli’ch swydd neu os ydych chi’n symud o fudd-daliadau presennol, gall amseru eich cais effeithio ar faint rydych chi’n ei gael. Dyma sut.

Mae Credyd Cynhwysol yn seiliedig ar eich enillion o’r mis blaenorol. Mae hyn yn golygu y gallai fod yn werth aros nes eich bod wedi derbyn eich siec cyflog terfynol cyn gwneud cais, yn enwedig os yw’n cynnwys arian ychwanegol fel:

• tâl diswyddo
• tal am wyliau nad oeddech wedi’u cymryd.

Os ydych yn cael eich cyflog ar ôl gwneud cais, gallai edrych fel eich bod yn ennill gormod i wneud cais am Gredyd Cynhwysol, gan wneud i chi aros am fis arall tan i’ch enillion ostwng. Os oeddech arfer cael budd-daliadau eraill, bydd rhaid i chi wneud cais am Gredyd Cynhwysol nawr.

Mae Credyd Cynhwysol wedi disodli’r budd-daliadau etifeddol hyn ac ni fydd taliadau pellach yn cael eu gwneud ar ôl 5 Ebrill 2025:

• Credyd Treth Plant

• Credyd Treth Gwaith

• Cymhorthdal Incwm

• Lwfans Ceisio Gwaith yn Seiliedig ar Incwm.

Mae’r budd-daliadau etifeddol hyn hefyd wedi cael eu disodli gan Gredyd Cynhwysol ond bydd taliadau’n parhau i nifer fach o bobl:

• Budd-dal Tai

• Lwfans Cyflogaeth a Chymorth yn Seiliedig ar Incwm, bydd taliadau’n parhau yn 2025, byddwch yn derbyn llythyr yn dweud wrthych pryd fydd angen i chi wneud cais am Gredyd Cynhwysol.

Am ragor o wybodaeth a help: 

• gweler y rhan Siaradwch ag ymgynghorydd Help i Hawlio gyda Chyngor ar Bopeth am gyngor am ddim ar ein tudalen
• gweler ein canllaw Symud i Gredyd Cynhwysol o fudd-daliadau eraill.

Mae Credyd Cynhwysol ar gael i bobl sy'n gadael y carchar. Os ydych ar fin gadael y carchar, mae yna ychydig o bethau y gallwch eu gwneud cyn eich rhyddhad i sicrhau bod eich cais yn mynd yn esmwyth a bod eich taliad cyntaf mor gyflym â phosibl.

Cyn eich rhyddhad byddwch yn cwrdd â staff o'ch tîm ailsefydlu (os ydych yng Nghymru neu Loegr) i drafod tai, cyllid, budd-daliadau ac addysg. Yr wythnos cyn eich rhyddhad. Bydd yr anogwr gwaith carchar yn eich helpu i baratoi eich cais a bydd yn trefnu eich cyfweliad yn y Ganolfan Gwaith.

Gallwch ymweld â Gov.uk am ganllaw manwl a fydd yn mynd â chi drwy hanfodion sut i wneud a rheoli cais Credyd Cynhwysol newyddYn agor mewn ffenestr newydd - gan gynnwys sut i ddarganfod a yw taliad ymlaen llaw yn iawn i chi. Bydd angen cyfrif banc arnoch i dderbyn eich taliadau. Bydd ein canllaw ar sut i agor cyfrif banc ar gyfer eich taliadau budd-daliadau yn eich helpu i sefydlu un.  

Gall eich anogwr gwaith carchar neu dîm ailsefydlu helpu os oes gennych gwestiynau pellach.

Os ydych chi'n byw yn yr Alban neu Ogledd Iwerddon, ni fydd gennych fynediad at dîm ailsefydlu. Dylech wneud eich cais cyn gynted â phosibl ar ôl i chi gael eich rhyddhau. Gweler ein canllawiau ar Sut i wneud cais am Gredyd Cynhwysol os ydych yn yr Alban a Sut i wneud cais am Gredyd Cynhwysol os ydych yng Ngogledd Iwerddon am fwy o fanylion. 

Creu cyfrif a gwneud cais am Gredyd Cynhwysol ar-leinYn agor mewn ffenestr newydd ar GOV.UK.

Gallwch ddechrau eich cais a dychwelyd ato yn ddiweddarach, ond rhaid ei gwblhau o fewn 28 diwrnod neu mae’n cael ei ailosod.

Os na allwch wneud cais ar-lein, ffoniwch y Llinell Gymorth Credyd CynhwysolYn agor mewn ffenestr newydd neu’r Ganolfan Gwasanaeth Credyd CynhwysolYn agor mewn ffenestr newydd yng Ngogledd Iwerddon. Efallai y byddan nhw’n trefnu i rywun eich ffonio’n ôl neu ymweld â’ch cartref.

Am help gyda’ch cais, siaradwch ag ymgynghorydd Cymorth i Hawlio Gyngor ar Bopeth am ddim

Ar ôl i chi wneud cais, fel arfer mae cyfnod aros o bum wythnos am eich taliad Credyd Cynhwysol cyntaf. Mae hyn yn cynnwys:

• cyfnod asesu pedair wythnos i gyfrifo faint fyddwch chi’n ei gael
• hyd at saith diwrnod i chi gael yr arian.

Os yw’r dyddiad talu yn disgyn ar benwythnos neu ŵyl banc, byddwch fel arfer yn cael yr arian y diwrnod gwaith cyn hynny.

Edrychwch ar ein canllaw Help i reoli eich arian tra byddwch yn aros am eich taliad Credyd Cynhwysol cyntaf am beth i’w wneud wrth i chi aros, gan gynnwys sut i wneud cais am daliadau ymlaen llaw os byddwch yn cael trafferth.