Os ydych yn cael trafferth talu’ch morgais, efallai y gallwch wneud cais am wyliau talu morgais. Darganfyddwch sut mae gwyliau talu morgais yn gweithio, pryd y gallwch fod angen un, a manteision ac anfanteision cael un.
Beth yw gwyliau talu morgais?
Mae gwyliau talu morgais yn gytundeb efallai y gallwch ei wneud gyda’ch benthyciwr sy’n eich galluogi i stopio neu ostwng eich ad-daliadau morgais misol dros dro.
Yn dibynnu ar eich amgylchiadau a hanes eich taliadau blaenorol, efallai y byddwch yn gallu cymryd egwyl am 12 mis. Ond mae angen bod gennych gynllun mewn lle ar gyfer sut y byddwch yn ailddechrau ad-daliadau yn y tymor hir.
Nid yw pob morgais yn cynnig y dewis o wyliau talu morgais - mae’n dibynnu ar delerau ac amodau’r cynnyrch.
A allwch gymryd gwyliau talu morgais?
Mae p'un a allwch chi gymryd gwyliau talu yn dibynnu ar sawl peth:
- eich benthyciwr
- eich contract morgais
- amgylchiadau ariannol
- faint o amser sydd wedi bod ers i chi gymryd eich morgais neu fenthyg ychwanegol
Bydd eich benthyciwr fel arfer yn disgwyl:
yr eiddo yw eich prif gartref ac rydych chi fel arfer yn byw ynddo
nad ydych wedi cymryd mwy na chwe mis o wyliau talu, a dim yn ystod y tair blynedd diwethaf
mae pawb a enwir ar forgais ar y cyd yn cytuno i'r gwyliau talu.
Weithiau, er mwyn bod yn gymwys ar gyfer gwyliau talu, bydd gofyn eich bod wedi talu gormod ar eich morgais yn y gorffennol. Mae hynny’n golygu talu mwy na’r taliadau misol a gytunwyd nes eich bod wedi adeiladu digon o gredyd i gymryd seibiant rhag talu.
Fodd bynnag, efallai y bydd eich benthyciwr hefyd yn gadael i chi ostwng neu ohirio eich taliadau morgais os ydych yn cael trafferth dros dro i gwrdd â’r costau misol oherwydd newid mewn amgylchiadau, fel diswyddiad neu fynd ar absenoldeb mamolaeth.
Os oes gennych ôl-ddyledion morgais ni fyddwch yn gymwys am wyliau talu morgais.
Ond peidiwch â gadael i hynny eich rhwystro rhag cysylltu â’ch benthyciwr. Byddant yn awyddus i’ch helpu i ddod i gytundeb.
Manteision gwyliau morgais
-
Maent yn rhyddhau ychydig o bwysau am gyfnod. Defnyddiwch ein Cynlluniwr cyllideb i weld ble allwch arbed neu dorri’n ôl pan fydd taliadau’n dechrau eto.
-
Mae gennych fwy o ryddid i dalu biliau sy’n ddyledus nawr.
-
Gall bod yn ddefnyddiol os ydych ond yn gwynebu gostyngiad dros dro i’ch incwm, fel absenoldeb mamolaeth neu fabwysiadu.
Anfanteision gwyliau morgais
-
Pan ddaw'r gwyliau talu i ben, bydd balans eich morgais sy'n weddill a thaliadau morgais yn uwch nag yr oeddent cyn y gwyliau. Mae hyn oherwydd pan nad ydych chi’n gwneud taliadau morgais, rydych dal yn cronni llog ar weddill eich morgais sy’n weddill.
-
Nid yw gwyliau morgais yn addas os yw incwm eich cartref wedi gostwng yn barhaol.
-
Gall gwyliau talu morgais gael effaith negyddol ar eich ffeil credyd.
Hyd yn oed os bydd eich benthyciwr yn cytuno i'r ateb dros dro hwn, bydd yn ymddangos ar eich ffeil credyd, a allai effeithio ar eich gallu i gael credyd yn y dyfodol. Meddyliwch a oes angen ymwrthodiad arnoch, fel eich benthyciwr yn cytuno i wyliau talu, ar adeg arall.
Os ydych mewn ôl-ddyledion neu’n cael trafferth i dalu eich morgais
Ydych yn meddwl am gymryd gwyliau talu oherwydd eich bod yn cael trafferth i gwrdd a’ch taliadau morgais neu mewn perygl o fynd i ôl-ddyledion? Yna mae'n bwysig siarad â’ch benthyciwr cyn gynted â phosibl am ddatrysiad gwahanol.
Efallai gall eich benthyciwr gytuno i leihau neu atal eich taliadau morgais os ydych chi'n cael trafferth talu'r gost fisol dros dro a gallwch brofi newid amgylchiadau, megis diswyddo neu fynd ar absenoldeb mamolaeth. Os ydych eisoes mewn ôl-ddyledion morgais, ni fyddwch yn gymwys ar gyfer gwyliau talu morgais, ond peidiwch â gadael i hynny eich atal rhag cysylltu â'ch benthyciwr.
Byddai'n well gan fenthycwyr ddod i gytundeb a fydd yn caniatáu i chi barhau i dalu eich morgais ar gyfradd is, felly cysylltwch â ni cyn gynted ag y byddwch chi'n cael trafferth.
Dewch o hyd i help yn ein canllaw Help gyda thaliadau morgais
Os nad ydych mewn ôl-ddyledion ond yn ei chael hi’n anodd cwrdd â’ch ad-daliadau, gallai fod yn werth chweil siopa o gwmpas am fargen morgais rhatach.
Darganfyddwch beth i edrych amdano cyn parhau yn ein canllaw Ailforgeisio i gael y fargen orau
Cyngor ar ddyledion
Cofiwch, mae cymryd gwyliau morgais ond yn addas fel cynllun dros dro – a phan fydd gennych ddigon o gynilion neu ecwiti (cyfalaf) yn eich eiddo i’ch rhwystro rhag mynd i ddyled na allwch ymdopi ag ef.
Os ydych yn dal i boeni, defnyddiwch ein teclyn Lleolwr cyngor ar ddyledion i ddod o hyd i gyngor ar ddyledion am ddim a dienw ar-lein, dros y ffôn, neu’n agos at ble rydych yn byw.
Gallwch hefyd gael cyngor ar ddyledion am ddim gan sefydliadau fel Cyngor ar BopethYn agor mewn ffenestr newydd neu StepChangeYn agor mewn ffenestr newydd
Sut i wneud cais am wyliau morgais
Gwiriwch gyda’ch darparwr benthyciadau ac edrychwch ar amodau a thelerau eich morgais i weld a ydych yn gymwys am wyliau talu morgais ac a yw hynny’n cael ei ganiatáu fel rhan o’ch cytundeb morgais.
Bydd y meini prawf yn amrywio o ddarparwr i ddarparwr:
- Mae cyfnod eich gwyliau talu fel arfer yn ôl disgresiwn y benthyciwr ac wedi'i deilwra i'ch amgylchiadau personol.
- Fel arfer, byddwch angen bod wedi gwneud taliadau yn brydlon am leiafswm o gyfnod cyn y byddwch yn gymwys i gael seibiant talu morgais.
- Bydd eich gallu i gymryd gwyliau morgais yn dibynnu hefyd ar faint yw eich morgais a gwerth eich cartref. Bydd rhai benthycwyr ond yn caniatáu gwyliau morgais os bydd y benthyciad i werth eich morgais yn is na 80%.
