Sut i gwyno am gyllid car wedi’i gamwerthu

Yn dilyn dyfarniad Llys Apêl, bydd yr FCA yn ymchwilio i gwynion cyllid ceir sy’n cynnwys pob comisiwn, gan gynnwys comisiynau sefydlog - nid trefniadau comisiwn yn ôl disgresiwn (DCAs) yn unig.

Mae hyn yn golygu y gallai fod iawndal yn ddyledus i lawer mwy o bobl. Rydym yn aros i ddysgu mwy am sut y bydd hyn yn gweithio, ond mae’n syniad da cyflwyno’ch cwyn cyn gynted â phosibl.

Ym mis Rhagfyr 2024, estynnodd yr FCA yr amser sydd gan gwmnïau cyllid ymateb i gwynion comisiwn nad ydynt yn ymwneud â’r DCA tan ar ôl Rhagfyr 2025. Mae hyn yn unol yn fras â’r rheolau presennol ar gyfer cwynion DCA, a eglurir ar y dudalen hon.

Byddwn yn darparu canllawiau gyda mwy o fanylion ar gwynion nad ydynt yn ymwneud â’r DCA yn fuan. Mae’r canllawiau canlynol ar gwynion os gwerthwyd cyllid i chi gyda DCA yn aros yr un fath. 

Cyn iddo gael ei wahardd ar 28 Ionawr 2021, roedd rhai gwerthwyr ceir a broceriaid credyd yn cael penderfynu ar y gyfradd llog y byddech yn ei thalu. 

Roeddent yn ennill mwy o arian pe gwnaethant werthu cyfradd llog uwch i chi, a elwir yn drefniant comisiwn dewisol. 

Mae hyn yn golygu y gallai cyllid car fod wedi cael ei gam-werthu i lawer, gan gynnwys: 

• Prynu Contract Personol (PCP), a 

• Hurbwrcas (HP). 

Ond nid yw hyn yn berthnasol i brydlesu ceir – a elwir hefyd yn Llogi Contract Personol (PCH). 

Mae miloedd eisoes wedi cwyno y gallent fod wedi gordalu, ond mae’r rhan fwyaf wedi cael eu gwrthod gan fenthycwyr.

I helpu, mae’r Awdurdod Ymddygiad Ariannol (FCA) wedi lansio ymchwiliad i weld a yw cwmnïau wedi gwneud unrhyw beth o’i le ac a yw cwynion yn cael eu rheoli’n deg.

Y syniad yw dweud wrth fenthycwyr sut i ymdrin â’r cwynion hyn a’r ffordd orau iddynt ddosbarthu unrhyw iawndal sy’n ddyledus. Disgwylir i’r FCA gyhoeddi ei ganfyddiadau a’r camau nesaf ym mis Mai 2025.

Tra bod yr FCA yn datrys hyn, nid oes angen i fenthycwyr ateb i gwynion newydd (a rhai diweddar). Ar hyn o bryd mae disgwyl i hyn bara tan ar ôl 4 Rhagfyr 2025, ond mae’n dal yn werth cwyno nawr. 

Mae’n rhaid i gwmnïau godi tâl teg arnoch, felly dylech gael iawndal os yw cyllid wedi’i gamwerthu. Mae hyn yn berthnasol i unrhyw gyllid a gymerwyd allan ar gerbyd ar gyfer ddefnydd personol, gan gynnwys ceir, faniau, campervans a beiciau modur

Caiff hyn ei gyfrifo’n aml fesul achos, ond gallai gynnwys:

• ad-daliad o’ch ad-daliadau

• taliad ewyllys da, a 

• y llog ar ei ben.

Gallai’r FCA benderfynu dweud wrth gwmnïau sut i gyfrifo hyn, yn dibynnu ar ganlyniad eu hymchwiliad.

Mae rhai cwmnïau wedi honni nad ydynt o fewn cwmpas yr ymchwiliad – gallwch weld rhestr o’r cwmnïau hyn sydd ddim yn defnyddio Trefniadau Dewisol y Comisiwn ar MoneySavingExpertYn agor mewn ffenestr newydd

Efallai y bydd sgamwyr yn cysylltu â chi i ddweud bod iawndal yn ddyledus i chi, a byddant yn gofyn am eich manylion fel y gallant gasglu gwybodaeth am eich hunaniaeth.

Byddwch yn ofalus os bydd unrhyw un yn cysylltu â chi’n annisgwyl ynghylch cyllid car a gamwerthwyd. Ym mron pob achos, sgam yw hyn.

Cyn cwyno, mae’n werth gwirio unrhyw waith papur sydd gennych (fel cytundeb cyllid) i weld a yw’n sôn am gomisiwn, ac i wirio ei fod wedi’i dynnu allan cyn 28 Ionawr 2021.

Byddai rhywfaint o gyllid car wedi cael ei werthu heb gomisiwn, neu gomisiwn sefydlog nad yw’n gysylltiedig â’r gyfradd llog a gawsoch.

Os nad ydych yn siŵr, dylech gwyno wrth eich benthyciwr. Mae’n rhad ac am ddim i’w wneud a’u cyfrifoldeb hwy yw ymchwilio i’ch achos.

Os nad ydych yn siŵr i ba gwmni y mae angen i chi gyfeirio’ch cwyn ato, gallwch:

• ofyn i’ch deliwr a ddarparodd y cyllid
• wirio eich ffeil credyd, gan y bydd yn cynnwys cytundebau sy’n mynd yn ôl 6 mlynedd

Mae’n bosib bod eich darparwr wedi cael ei gymryd drosodd gan gwmni newydd - yn yr achos hwn, gallwch dal gwneud cwyn.

Dyma sut i wneud cwyn newydd:

1. Casglwch unrhyw wybodaeth am gyllid eich car. Fel arfer gallwch gwyno o fewn tair blynedd o sylwi bod rhywbeth o’i le, neu chwe blynedd o’r cyllid yn cael ei werthu i chi.
   
2. Cwynwch i’ch benthyciwr, yn ysgrifenedig yn ddelfrydol. Dywedwch wrthynt eich bod yn meddwl eich bod wedi gordalu a chynnwys cymaint o wybodaeth ag sydd gennych. Mae gan Which? dempled am ddim ar sut i gwynoYn agor mewn ffenestr newydd a mae gan MoneySavingExpert dempled am ddim Yn agor mewn ffenestr newydd  y gallwch ei ddefnyddio hefyd.
3. Bydd eich benthyciwr yn adolygu eich achos ac yn darparu ymateb terfynol, gan gynnwys yr hyn y bydd yn ei wneud i unioni pethau. Ar hyn o bryd mae ganddynt tan 4 Rhagfyr 2025 i wneud hyn.
4. Os ydych yn anhapus gyda’r ymateb terfynol, neu os nad ydynt yn ymateb mewn amser, gallwch fynd â’ch cwyn at Wasanaeth yr Ombwdsmon Ariannol (FOS) am ddim. Mae pa mor hir sydd gennych i gwyno i FOS yn dibynnu ar pryd y byddwch yn derbyn eich ymateb terfynol
5. Bydd y FOS yn rhoi penderfyniad annibynnol i chi ynghylch a oedd ymateb eich benthyciwr yn deg neu a oes angen iddo wneud mwy.
   

Meddyliwch yn ofalus cyn defnyddio cwmni i wneud cwyn.

Fel arfer, byddant yn cymryd cyfran fawr o unrhyw iawndal a gewch ac yn dilyn yr un broses y gallech ei gwneud eich hun yn hawdd.

Os ydych yn anhapus ag ymateb terfynol eich darparwr, gallwch gwyno i Wasanaeth yr Ombwdsmon AriannolYn agor mewn ffenestr newydd

Bydd angen i chi fynd â’ch cwyn i’r Ombwdsmon Ariannol cyn y dyddiad cau:

• Os anfonir ymateb terfynol atoch rhwng 12 Gorffennaf 2023 a 29 Ebrill 2025, bydd gennych tan 29 Gorffennaf 2026 i gwyno i’r Ombwdsmon Ariannol.
• Os anfonir ymateb terfynol atoch rhwng 30 Ebrill 2025 a 29 Ionawr 2026, bydd gennych 15 mis o’r dyddiad y cafodd ei anfon i gwyno i’r Ombwdsmon Ariannol.

Mae hyn yn rhoi amser ychwanegol i chi weld canlyniad ymchwiliad yr FCA cyn mynd â’ch cwyn ymhellach.

Mae degau o filoedd eisoes wedi cwyno, ond mae’r rhan fwyaf o’r rhain wedi cael eu gwrthod gan fenthycwyr

Dyma’r prif reswm pam mae’r FCA wedi camu i mewn i ymchwilio.

Os ydych eisoes wedi derbyn cynnig neu os yw’r Gwasanaeth Ombwdsmon Ariannol (FOS) wedi ochri gyda’r benthyciwr, ni fyddwch yn gallu cwyno eto (oni bai eich bod yn dewis mynd i’r llys). Fel arall, mae gennych fwy o opsiynau.

Os gwnaethoch gwyno cyn 17 Tachwedd 2023, roedd gan eich benthyciwr wyth wythnos i roi ymateb terfynol i chi.

Os nad yw’r benthyciwr wedi ymateb mewn pryd, neu os nad ydych yn fodlon â’r ymateb, gallwch fynd â’ch cwyn at Wasanaeth yr Ombwdsmon Ariannol am ddim i gael penderfyniad annibynnol. 

Bydd angen i chi wneud yn siŵr eich bod yn cwyno i’r Ombwdsmon Ariannol erbyn y dyddiad a roddir yn yr ymateb terfynol.

Os gwnaethoch gwyno rhwng 17 Tachwedd 2023 a 10 Ionawr 2024 a’ch bod yn anhapus ag ymateb terfynol eich benthyciwr, gallwch fynd â’ch cwyn at Wasanaeth yr Ombwdsmon Ariannol am ddim i gael penderfyniad annibynnol. 

Ond efallai yr hoffech aros i weld canlyniad ymchwiliad yr FCA yn gyntaf.

Bydd angen i chi gwyno i FOS erbyn pa un bynnag ddaw yn ddiweddarach, naill ai:

• 15 mis o’r dyddiad yr anfonwyd yr ymateb terfynol, neu
• 29 Gorffennaf 2026.

Mae gennych 15 mis o’r dyddiad yr anfonwyd yr ymateb terfynol i fynd â’ch cwyn i’r FOS.

Os nad ydych wedi cael ymateb terfynol, mae’r dyddiad cau arferol o wyth wythnos i’ch benthyciwr ateb wedi cael ei oedi. 

Yn hytrach, dylent egluro beth sy’n digwydd a sut yr effeithir ar eich cwyn, o dan yr amserlenni presennol, y diweddaraf y dylech glywed yn ôl yw 4 Rhagfyr 2025.

Mae gan eich darparwr hyd at 30 Ionawr 2026 i ymateb i’ch cwyn. Dylent gydnabod eich cwyn o hyd – os nad ydynt, cysylltwch â nhw i wirio eu bod wedi’i dderbyn.

Ar ôl i chi gael ymateb terfynol, gallwch fynd â’ch cwyn i’r Gwasanaeth Ombwdsmon Ariannol am benderfyniad annibynnol am ddim.

Ond efallai yr hoffech aros i weld canlyniad ymchwiliad yr FCA yn gyntaf.

Bydd angen i chi gwyno i FOS erbyn pa un bynnag ddaw yn ddiweddarach, naill ai:

• 15 mis o’r dyddiad yr anfonwyd yr ymateb terfynol, neu
• 29 Gorffennaf 2026.

Gallwch gwyno o hyd os oes gennych broblem gyda chyllid car wedi’i dynnu allan ar ôl 28 Ionawr 2021.

Byddwch yn dilyn y broses gwynion arferol a’r amserlenni safonol.

Gweler Sut i gwyno os oes cyllid wedi’i gam-werthu i chi am fwy o help.