Os oedd gennych gytundeb cyllid modur gyda chomisiwn cudd, mae siawns y gallech hawlio iawndal. Mae'r Llys Apêl wedi dyfarnu bod y comisiynau hyn yn anghyfreithlon. Dyma beth sy'n digwydd a beth allwch chi ei wneud nesaf.
Beth sydd yn y canllaw hwn
Mae comisiwn cudd yn anghyfreithlon a gallai fod iawndal yn ddyledus i lawer
Ym mis Hydref 2024, aethpwyd â chwynion am gomisiwn nas datgelwyd i'r Llys Apêl. Dyfarnodd y barnwr y dylai cwsmeriaid fod wedi cael yr holl fanylion ar unrhyw fath o gomisiwn mewn cytundebau cyllid car.
Mae hyn yn golygu y gallai llawer o gynigion cyllid car fod wedi cael eu camwerthu.
Bydd yr achos nesaf yn cael ei ddwyn i'r Goruchaf Lys, a fydd yn gwneud dyfarniad terfynol i benderfynu a fydd iawndal yn ddyledus i gwsmeriaid. Gallai hyn fod mor hwyr â Gwanwyn 2025.
Ar hyn o bryd mae siawns well y byddwch yn cael iawndal os oedd gan eich cytundeb DCA
Mae'r mater hwn ar wahân, ond yn ymwneud ag ymchwiliad i gytundebau cyllid ceir a oedd yn cynnwys math penodol o gomisiwn o'r enw "trefniant comisiwn dewisol" (DCA).
Yn wreiddiol, roedd yr FCA yn ymchwilio i gytundebau cyllid ceir gyda DCAs. Os oedd eich cytundeb o cyn mis Ionawr 2021 a bod gennych DCA, mae siawns well y byddwch yn cael iawndal drwy gwyno ar y sail hon.
Os ydych chi'n credu efallai eich bod wedi prynu'ch cerbyd gyda chytundeb DCA, gallwch gyflwyno cwyn nawr. Darganfyddwch fwy am Sut i gwyno am DCAs sydd wedi'u cam-werthu mewn cyllid car.
Pwy sy'n gallu cwyno?
Gallai iawndal fod yn ddyledus i chi os:
gwnaethoch gymryd cyllid modur rhwng Ebrill 2007 a Hydref 2024 (gan gynnwys ceir, faniau, cerbydau gwersylla a beiciau modur)
roedd eich cytundeb yn Bryniant ar Gytundeb Personol (PCP), Hurbwrcas (HP) neu Gytundeb Prydlesu Personol (PCH, a elwir yn aml yn les)
prynwyd eich cerbyd at ddefnydd personol
roedd eich cytundeb yn cynnwys trefniant comisiwn nad oedd wedi cael ei esbonio i chi yn llawn.
Defnyddio templed llythyr cwyn am ddim
Os ydych chi'n ystyried cwyno, mae'n syniad da defnyddio llythyr templed am ddim fel nad oes angen i chi dalu cwmni rheoli hawliadau. Gall y cwmnïau hyn godi hyd at 30% o unrhyw iawndal sy'n ddyledus i chi ac ni fyddant yn gyflymach.
Gellir defnyddio'r llythyr templed am ddim sydd ar gael ar MoneySavingExpert i gwyno a gwirio a werthwyd unrhyw gyllid i chi gyda chomisiwn cudd.
Gwneud cwyn
Pam ddylech chi osgoi defnyddio cwmni rheoli hawliadau
Efallai eich bod wedi gweld hysbysebion ar gyfer cwmnïau sy'n gallu cwyno ar eich rhan. Mae'r cwmnïau hyn fel arfer yn cymryd canran fawr o unrhyw iawndal - hyd at 30%.
Os yw'n bosibl, gwnewch y gŵyn eich hun fel bod unrhyw iawndal yn mynd yn syth i chi. Gallwch ddefnyddio templed cwyn am ddim i helpu.
Gall edrych yn frawychus ond mae'n broses syml a allai arbed cannoedd o bunnoedd i chi. Ni fydd cwmni rheoli hawliadau yn gyflymach nac yn gwneud unrhyw beth na allwch ei wneud eich hun.
Yn gyntaf, cwynwch i'ch benthyciwr
Casglwch unrhyw wybodaeth am gyllid eich car. Yna gwnewch gŵyn i'ch benthyciwr, yn ysgrifenedig yn ddelfrydol.
Bydd angen i chi gwyno wrth y cwmni yr oeddech yn ei dalu bob mis. Os nad ydych yn siŵr pwy ydyw, gallwch wirio'ch adroddiad credyd (os oedd y cytundeb yn weithredol yn ystod y chwe blynedd diwethaf) neu hen gyfriflenni banc os oes gennych rai.
Dywedwch wrth y benthyciwr eich bod wedi talu comisiwn cudd a chynnwys cymaint o wybodaeth ag sydd gennych. Gallwch ddod o hyd i dempled am ddim ar gyfer cwynion ar MoneySavingExpert.
Cael ymateb
Dylech gael ymateb gan y benthyciwr i gadarnhau ei fod wedi derbyn eich cwyn o fewn ychydig wythnosau. Os na fyddwch yn clywed unrhyw beth, cysylltwch â'r cwmni eto i weld a ydynt wedi’i gael.
Dylai eich benthyciwr gadarnhau a oedd gennych drefniant comisiwn. Fodd bynnag, mae'r FCA wedi rhoi mwy o amser i gwmnïau ymateb i gwynion, felly efallai na fyddwch yn clywed yn ôl am gyfnod.
Mae'r hyn a wnewch nesaf yn dibynnu ar yr ymateb a gewch:
Os oedd gennych chi drefniant comisiwn, nid oes angen i chi wneud unrhyw beth arall am y tro. Pan fydd y Goruchaf Lys yn gwneud ei benderfyniad ar gomisiynau cudd, bydd cwsmeriaid yn cael manylion am yr hyn y mae angen iddynt ei wneud nesaf.
Os nad oedd gennych chi gytundeb comisiwn neu os cafodd ei ddatgelu'n llawn, yn anffodus mae'n annhebygol y bydd unrhyw iawndal yn ddyledus i chi. Os ydych yn anghytuno, gallwch fynd â'ch cwyn at Wasanaeth yr Ombwdsmon Ariannol
Os nad yw'ch benthyciwr yn rhoi unrhyw ymateb pellach i chi, peidiwch â phoeni. Cyn belled â bod eich cwyn wedi'i chydnabod, byddwch yn gallu cymryd y camau nesaf unwaith y bydd y Goruchaf Lys wedi gwneud ei benderfyniad.
Os nad ydych yn cael ymateb o gwbl
Os na fyddwch yn cael unrhyw ymateb o gwbl, neu os ydych yn anghytuno ag ymateb y darparwr benthyciadau, gallwch fynd â'ch cwyn at Wasanaeth yr Ombwdsmon Ariannol (FOS) am ddimYn agor mewn ffenestr newydd
Beth fydd yn digwydd nesaf?
Mae'r cyfan yn dibynnu ar benderfyniad y Goruchaf Lys. Mae'n debygol y bydd yr achos yn cael ei glywed cyn 16 Ebrill, ond gallai penderfyniad terfynol gael ei wneud mor hwyr â Gwanwyn 2025.
Os yw iawndal yn ddyledus, bydd yr FCA yn nodi'r canllawiau ar gyfer sut y dylai pobl gwyno a beth y byddant yn ei gael.
Mae hyn yn golygu, unwaith y bydd eich cwyn wedi'i chofnodi, y cam nesaf yw aros a gweld beth sy'n digwydd.