Rhybudd o sgam: peidiwch ag ymateb i negeseuon testun, negeseuon e-bost na galwadau am y Taliad Tanwydd Gaeaf

Grant gan y llywodraeth yng Nghymru a Lloegr yw’r Taliad Tanwydd Gaeaf i helpu i dalu biliau gwresogi, sy'n werth rhwng £100 a £300 bob blwyddyn.

Bydd y llywodraeth fel arfer yn darganfod a ydych chi'n gymwys ac yn anfon llythyr atoch ym mis Hydref neu fis Tachwedd yn dweud wrthych faint y byddwch chi'n cael eich talu ym mis Tachwedd neu fis Rhagfyr.

Mae hyn yn golygu nad oes rhaid i chi wneud unrhyw beth i'w gael fel arfer.

Gallwch weld pwy sy'n gymwys ar gyfer y Taliad Tanwydd Gaeaf a phwy sydd angen gwneud cais ar GOV.UK.  

Os oes angen i chi wneud cais, neu os oes unrhyw ymholiadau, gwnewch yn siŵr eich bod yn cysylltu â'r Ganolfan Taliad Tanwydd Gaeaf swyddogol

Gallwch ffonio'r llinell gymorth neu ysgrifennu drwy'r post neu e-bost.

Cofiwch, mae'r taliad yn awtomatig i bawb bron â bod, felly nid yw unrhyw un sy'n pwyso arnoch i drosglwyddo manylion neu i ddilyn cyfarwyddiadau yn dod ô’r llywodraeth.

Nid oes angen i chi ddatgloi, rhyddhau arian na chadarnhau manylion.

Ni fydd y llywodraeth byth yn cysylltu â chi i wneud cais am y Taliad Tanwydd Gaeaf drwy:

• neges destun 

• galwad ffôn

• e-bost

• hysbyseb neu neges cyfryngau cymdeithasol.

Os cysylltir â chi, mae'n debygol bod sgamiwr yn ceisio eich twyllo i roi eich manylion banc a gwybodaeth bersonol arall. 

Er enghraifft, efallai y bydd neges destun neu e-bost yn ymddangos fel un sy'n cael ei anfon gan CThEF neu'r DWP, gyda dolen i wefan lle gallwch wneud cais am y Taliad Tanwydd Gaeaf – neu daliadau neu grantiau eraill y llywodraeth.

Bydd y wefan hon yn ffug a gall unrhyw wybodaeth rydych chi'n ei rhoi gael ei gweld a'i defnyddio gan y twyllwr.

Os ydych chi'n meddwl y gallai sgamiwr fod wedi cysylltu â chi:

• peidiwch â chlicio ar unrhyw ddolenni na rhoi unrhyw wybodaeth bersonol, a/neu

• gorffenwch yr alwad.

Cofiwch, bydd y rhan fwyaf o bobl yn derbyn y Taliad Tanwydd Gaeaf yn awtomatig os ydyn nhw'n gymwys.

Ar gyfer unrhyw ymholiadau, gallwch ffonio neu ysgrifennu at y Ganolfan Taliad Tanwydd Gaeaf swyddogol ar GOV.UK.

Er mwyn helpu'r llywodraeth i ymchwilio ac atal unrhyw un rhag credu'r sgamiau hyn, dylech bob amser:

• anfon negeseuon amheus at:
  • negeseuon e-bost i report@phishing.gov.uk
  • negeseuon testun i 7726 – ni fyddwch yn talu am hyn
• rhoi gwybod am hysbysebion sgam ar-lein i'r Awdurdod Safonau Hysbysebu (ASA)

Os yw'n ymddangos bod y sgam yn dod gan CThEF, gallwch hefyd:

• anfon negeseuon CThEF amheus at:
  • negeseuon e-bost at phishing@hmrc.gov.uk
  • negeseuon testun i 60599 – byddwch yn talu'ch cyfradd arferol
• rhoi gwybod am y canlynol sy’n ymddangos ei fod gan CThEF a’u bod yn amheus:
  • galwadau ffôn ar GOV.UK 
  • negeseuon cyfryngau cymdeithasol neu gyfrifon i security.custcon@hmrc.gov.uk.

Gallwch gofrestru ar gyfer y Gwasanaeth Dewis Ffôn am ddim i roi'r gorau i dderbyn galwadau gwerthu a marchnata gan gwmnïau dilys.  

Efallai na fydd hyn yn atal y galwadau sgam ond gallai ei gwneud hi'n haws sylwi pan fydd sgamiwr yn honni ei fod o sefydliad cyfreithlon.

Os ydych chi'n poeni y gallech fod wedi dioddef sgam, gallwch:

• roi gwybod am y sgam i Report Fraud os ydych chi'n byw yng Nghymru, Lloegr neu Ogledd Iwerddon 

• cysylltu â'r Heddlu i roi gwybod am y drosedd os ydych chi'n byw yn yr Alban.

Os ydych wedi rhannu unrhyw un o'ch manylion personol, gallwch hefyd gysylltu â thîm diogelwch CThEF drwy e-bostio security.custcon@hmrc.gov.uk. 

Os ydych wedi rhannu unrhyw un o'ch manylion banc, fel rhif eich cerdyn debyd, cysylltwch â'ch banc neu gymdeithas adeiladu i roi gwybod iddynt.

Gallwch ffonio 159 i gysylltu â'r rhan fwyaf o fanciau a chymdeithasau adeiladu'r DU.