O 55 oed (57 oed o fis Ebrill 2028), gallwch fel arfer gymryd hyd at 25% o’ch arian pensiwn heb orfod talu unrhyw dreth. Gelwir hyn yn gyfandaliad di-dreth.

I’r rhan fwyaf o bobl, mae’r uchafswm cyfandaliad di-dreth wedi’i osod ar £268,275. Gelwir hyn yn lwfans cyfandaliad (LSA).

Dysgwch fwy yn ein canllawiau:

• Lwfansau cyfandaliad pensiwn di-dreth
• Sut i gymryd eich pensiwn: canllaw cam wrth gam.

Os oes gennych bensiwn cyfraniadau wedi’u diffinio yn y DU, rydym hefyd yn cynnig apwyntiadau Pension Wise am ddim i helpu i esbonio'ch opsiynau ar gyfer cymryd arian.

Dylid meddwl yn ofalus cyn cymryd arian o’ch pensiwn.

Dyma beth i’w ystyried os ydych chi’n poeni am unrhyw adroddiadau yn y cyfryngau ac yn ystyried cymryd arian o’ch pensiwn nawr.

Fel arfer dim ond pan fyddwch yn cymryd eich pensiwn y byddwch yn talu treth. Mae hyn yn golygu y gall eich arian dyfu mewn pensiwn heb fod angen i chi dalu treth. Er enghraifft, os oedd yr arian mewn cyfrif cynilo safonol yn lle hynny, efallai y bydd angen i chi dalu treth ar y llog.

Os byddwch yn marw cyn Ebrill 2027, fel arfer gellir trosglwyddo arian mewn cynllun pensiwn cyfraniadau wedi’u diffinio i’ch buddiolwyr heb orfod talu Treth Etifeddiant (IHT). Byddai unrhyw arian y tu allan i bensiwn fel arfer yn cael ei gyfrif fel rhan o’ch ystâd, felly byddai IHT yn berthnasol.

O fis Ebrill 2027 ymlaen, bydd cronfeydd pensiwn heb eu gwario fel arfer yn cael eu cynnwys yn eich ystâd at ddibenion Treth Etifeddiant. Mae’r llywodraeth wedi dweud y bydd rhai eithriadau, ond mae’r manylion yn parhau i gael eu trefnu.

Darllenwch fwy am hyn yn ein canllaw ar Dreth Etifeddiant.

Os cymerwch arian o’ch pensiwn yn gynt na’r disgwyl, bydd angen i chi wneud iddo bara am gyfnod hirach. Gallai hyn olygu y bydd gennych lai o arian bob blwyddyn ar ôl ymddeol oherwydd ei fod wedi’i wasgaru dros fwy o flynyddoedd.

Er mwyn sicrhau bod gennych ddigon o arian yn ddiweddarach mewn bywyd, meddyliwch yn ofalus pryd i gael mynediad at eich pensiwn a chynlluniwch sut i reoli eich arian.

Bydd ein Cyfrifiannell Pensiynau yn dangos eich incwm ymddeoliad tebygol a sut y byddai’n newid pe baech yn cymryd cyfandaliad arian parod di-dreth.

Cyn cymryd arian o’ch pensiwn, mae’n werth ystyried talu am gyngor. Er enghraifft, os byddwch yn dewis cymryd cyfandaliad di-dreth, bydd angen i chi hefyd benderfynu beth sydd orau ar gyfer gweddill eich arian pensiwn.

Bydd ymgynghorydd ariannol rheoledig yn gallu rhoi cyngor i chi am y rheolau treth cyfredol ac egluro eich opsiynau, gan gynnwys gadael eich arian wedi’i fuddsoddi a chael incwm.