Pryd mae cofrestru awtomatig ar gyfer pensiwn yn dechrau?

Os oes gennych chi gyflogwr, mae'n rhaid iddyn nhw gynnig cynllun pensiwn. Gelwir hwn yn bensiwn gweithle ac mae'n eich galluogi i gynilo ar gyfer ymddeoliad.

Mae'n rhaid i chi gael eich cofrestru'n awtomatig i mewn i bensiwn gweithle os ydych:

• yn breswylydd yn y Deyrnas Unedig

• fel arfer yn gweithio yn y Deyrnas Unedig

• rhwng 22 oed ac oedran Pensiwn y WladwriaethYn agor mewn ffenestr newydd 

• yn ennill mwy na £10,000 y flwyddyn, £833 y mis neu £192 yr wythnos

• nid oes gennych bensiwn gweithle addas eisoes.

Rhaid i'ch cyflogwr hefyd gyfrannu o leiaf 3% o'ch cyflog i'ch pensiwn. Mae hwn yn arian ychwanegol y byddech yn ei golli pe baech yn penderfynu gadael y cynllun pensiwn, o'r enw optio allan.

Fel arfer, sefydlir pensiwn o fewn tri mis i chi fodloni'r meini prawf cofrestru awtomatig. Am fwy o wybodaeth, gweler ein canllaw Sut mae cofrestru awtomatig ar gyfer pensiwn yn gweithio.

Nid oes angen i chi aros nes eich bod yn bodloni'r meini prawf cofrestru awtomatig i gael pensiwn gweithle, rhaid i'ch cyflogwr adael i chi ymuno os ydych yn gofyn rhwng 16 a 74 oed.

Bydd ymddeol yn teimlo’n bell iawn i ffwrdd, ond mae dechrau pensiwn yn gynnar yn golygu y bydd gennych fwy o amser i gronni digon o arian ar gyfer bywyd hwyrach cyfforddus. Efallai y byddwch hyd yn oed yn gallu fforddio rhoi'r gorau i weithio’n iau.

Fel arfer, bydd pensiwn yn cynyddu'ch arian yn gynt na mathau eraill o gynilion. Mae hyn oherwydd bod eich cyfraniadau pensiwn fel arfer yn cael hwb gan:

• ostyngiad treth – mae'r Dreth Incwm y byddech fel arfer yn ei dalu yn mynd i mewn i'ch pensiwn yn lle hynny

• twf buddsoddi – fel arfer mae eich arian yn cael ei reoli ar eich rhan felly dylai gynyddu dros amser.

Bonws arall o ymuno â phensiwn gweithle yw cyfraniadau cyflogwr. Dyma arian y mae'n rhaid i'ch cyflogwr ei dalu i'ch pensiwn os ydych yn ymuno â'r cynllun ac yn ennill dros:

• £6,240 y flwyddyn

• £520 y mis neu

• £120 yr wythnos.

Rhaid i gyfraniadau cyflogwyr fod o leiaf 3% o'ch cyflog, ond gallant ddewis talu mwy. Gofynnwch i'ch cyflogwr a ydyn nhw'n cynnig paru cyfraniadau - efallai y byddan nhw'n talu mwy os gwnewch chi.

Gallwch ddefnyddio ein cyfrifiannell cyfraniadau pensiwn gweithle i weld faint fydd yn cael ei dalu i'ch pensiwn fel arfer, yn seiliedig ar eich oedran a'ch cyflog.    

Mae pensiwn wedi'i gynllunio i roi arian i chi fyw, fel y gallwch roi'r gorau i weithio ac ymddeol. Mae hyn yn golygu y bydd eich arian yn cael ei gloi nes eich bod yn hŷn o lawer.

Y cynharaf y gallwch gael gafael ar eich arian pensiwn ar hyn o bryd yw 55 oed, oni bai bod angen i chi ymddeol yn gynnar oherwydd iechyd gwael. Mae hyn yn codi i 57 oed o Ebrill 2028 a disgwylir iddo gynyddu'n raddol dros amser.